مذكرات بنت عايزه تتجوز(الحلقه20)عقبالك يوم ميلادك

من طرف محمد الجندى الثلاثاء فبراير 12, 2008 8:57 pm

قريبا ً مذكرات بنت عايزه تتجوز

قريب أوى هنا ان شاء الله فى التبك ده وعلى منتدى الفنان هجبلكو مذكرات بنت عايزه تتجوز
وهتكون سلسله بشكل يومى
أنا متأكد أنها هتعجبكو جدا
أن شاء الله مش هتأخر عليكم
بس عايز اشوف ردتكم على شان أتأكد أنكم عايزين تشوفو مذكراتها

هاتهلنا يا جندى باشا
يمكن تكون من حظنا
هههههههههههههه

من طرف MASTER الثلاثاء فبراير 12, 2008 9:17 pm

هى مذكرات بنت عاوزة تتجوز بلا فخر ؟؟؟
صاحبة المدونة
أوك تبقى جميلة جدا ...
شكرا مقدما يا جندى ...

من طرف أبو محمود الثلاثاء فبراير 12, 2008 10:39 pm

شكرا شكرا يا جندي احنا بحاجة الى شئ يغير من رتابة النت بعد فوزنا بكاس أفريقيا

من طرف محمد سند الأربعاء فبراير 13, 2008 12:12 am

فكرة جميلة يا جندي بس انا شايفها مرهقة لو بقيت يوميه هتتعب فيها قوي ربنا يعينك
ياريت ماتكونش يوميه علشان الاخوه يحاولو يقروها كويس ويردو عليها واخاف يصيبك الاحباط لو عدد الردود كان اقل من المجهود واسف يا جندي على رايي بس انا عايز الكل يتمتع بمجهودك
اتمنى من الجميع ان يساندو هذه اليوميات فانا اراها مرهقة ومتعبة فارجو من الجميع تقديم المساعدة والمساندة والتشجيع بردود جميلة اعتدنا عليها منكم
شكرا ودمتم لنا

من طرف lovly girl الأربعاء فبراير 13, 2008 4:28 am

فكرة جامدة يا جندي
مستنين المذكرات ومستنين افكارك الجامدة علي طول

من طرف hoss65 الأربعاء فبراير 13, 2008 6:57 am

احنا فى الانتظار ياباشا

من طرف **الدوحة** الأربعاء فبراير 13, 2008 8:29 am

جميل يا جندى

فكرة جميلة يا جندي ربنا يقدرك واحنا معاك

من طرف el-pop الأربعاء فبراير 13, 2008 1:33 pm

فكره حلوه يا جندى مستنين المذكرات نشوف ظروف البنيه هههههههههههههههههههه

فكره حلوه منتظرين

من طرف **بطاطس** الأربعاء فبراير 13, 2008 3:35 pm

الفكرة دى هتنجح
البطس رايه كده
وكمان هو مستنيها
هههههههههههههههههههههههه

من طرف محمد الجندى الأربعاء فبراير 13, 2008 5:24 pm

إستفتاحة

هاي يا اللي بتقروا
شوفوا بقه ..البلوج ده أنا عاملاه عشان أفضفض فيه بدل ما أكلم نفسي ..لأني من ساعة ما اتخرجت و بدأ يجيلي عرسان ..و بما إني ماليش أصحاب كتير أتكلم معاهم ..لقيت نفسي ساعات كتيره باتكلم مع نفسي ..أتناااقش و أتخااانق في الأول جوه أودتي و بعدين لقيت العملية وسعت مني و بدأت أكلم نفسي في المواصلات كمان ..فقلت بدل ما العملية تستفحل معايا و يدخلوني السراية و يلبسوني القميص أعملي بلوج أتكلم فيه مع نفسي و معاكم ..على الأقل ما فيش حد هييجي يشحنني ع الخانكة
تمام؟..فهمتوا ..يعني أنا مش عاملاه عشان أشتكي لحد حالي ..لأن الشكوى لغير الله مذلة ..و مهما أشتكيت لطوب الأرض ..فالمستقبل بيد الله و اللي عايزة ربنا هايكون..و أنا ما أقدرش أشتكي لأن ده فيه شبهة إعتراض على إرادة الله ..ربنا يحفظنا
الموضوع ان انا ماليش حد أحكيله فهاحكيلكوا و اطلع الكلام اللي جوايا

من طرف محمد الجندى الأربعاء فبراير 13, 2008 5:27 pm

ياللا نبتدي

سموا كده و خليكوا معايا واحدة واحدة...خلينا نتفق الأول ان موضوع الجواز و العرسان و تأخر الجواز ده موضوع حساس جدا..وصعب جدا انكوا تلاقوا حد بيتكلم فيه بصراحة..خصوصا بالنسبة للبنات....لأن اللي بتتكلم فيه بصراحة يا إما بيتبصلها على إنها قليلة الأدب و ماتربتش ..يا إما على انها مسروعة ع الجواز ..يا إما على انها بارت و مش لاقيه حد يتجوزها..عشان كده تلاقوا بنات كتير بتقول ..جواز ايه بلا نيلة ..يعني هم اللي اتجوزوا كانوا خدوا ايه...انا قاعده في بيت أبويا معززة مكرمة ,ايه اللي يخليني أروح أتبهدل مع حد ماعرفوش..أنا ما بافكرش في الجواز دلوقتي لما أبني مستقبلي ..و الجملة المستهلكة في كل الأفلام العربية .."لما أحقق ذاتي ""...مش عارفه ايه ذاتها دي و تحققها ازاي يعني

يمكن فيه بنات كتير ليهم طموح في دراستهم و في شغلهم ..لكن أتحدي ان أي واحدة فيهم مايكونش طموحها الأول انها تبقى زوجه ..على الأقل لأن دي الطريقة الوحيده اللي تخليها تبقى أم

نتفق بقه على أسس تانية مهمة ....عدد البنات في مصر أكبر من عدد الرجالهدي نقطة أساسية مش عايزة أي حد يناقشني فيها ( البلوج ده مش ديمقراطي على فكرة) ..و سيبوكوا بقه من إحصائيات الحكومة اللي بتقولك عدد الإتنين زي بعض ..لأن دي إحصائيات عاملة بالظبط زي درجات الحرارة اللي بيعلنوها في النشرة ..يعني الناس بتحلف بالطلاق ان الحرارة أكيد فوق ال 45 ..و هما لا يمكن يزودوها عن 38..أنا ليا واحد صاحب بابا قاللي ممنوع يزيعوا ان الحرارة فوق ال42 عشان السياحة ماتنضربش و السياح مايهربوش

موضوع نسبة الإناث للذكور برده فيها لعب بالطريقة دي..ليه بقه النسبة أكبر؟ أقولكم

موضوع الستات اللي بيقعدوا يخلفوا عشان يجيبوا الولد..يعني فيه عائلات كتيرة تلاقيها كده..4 بنات وولد..5بنات وولد..6 بنات وولد ..و هكذا...و تفضل الست تخلف تخلف عشان البأف جوزها يجيله الواد..يجيبوا يعمل بيه ايه؟ ماتعرفش ..و بيجي في الآخر خايب و نايب و يقعدوا يدلعوا فيه لما يطلع فسدان و يضيعهلم اللي وراهم و اللي قدامهم و اللي جنبهم كمان...ما علينا ده موضوع تاني..بس أي حد بيدرس أو درس في أي كلية في جامعات مصر هيلاحظ ان عدد البنات في أي كلية أكبر من عدد الولاد ..في كليتي مثلا كانوا تلتين العدد بنات و التلت ولاد ..يعني الضعف

نقطة تانية ..الرجالة بقوا حاسين بنفسهم و بيتكبروا على خلق الله من البنات ( يقعدلهم في عينهم و عافيتهم يا رب ) و تلقي الراجل قاعد هو و أمه يتشرطوا ...لازم تبقى بيضا و شعرها بني و عينيها عسلي و شبه نيللي كريم ..الله يخرب بيوتكم طب بص لنفسك يا خويا في المرايه الأول ..طب بلاش بيقولوا الراجل مايعيبوش الا جيبه ..طب شبرقنا كده و ادخل في ايدك انشالله علبة ملبس ..ألا لأ البعيد هو و امه يروحوا يشوفوا العروسة الغلبانه اللي أهلها صارفين عليها الشئ الفلاني و مكلفين قعدة التعارف دي شئ و شويات ..رايحين إيد ورا و إيد قدام ..و البت مافيهاش أي عيب و يقولولكم ..لأ أصلها مش شبه نيللي كريم قوي ..دي قالبه شوية على نجلاء فتحي و انا مابحبش النوع ده ..تقولش حسين فهمي رايح يتقدم للبت

لأ و الأفراح ..نككككتة..زمان كنتوا تشوفوا في الأفلام العربي أي بنت تدخل فرح و هي لابسه شيك كده شوية ..يتلموا عليها الشبان و يبقوا عايزين ياكلوها .. و ما تخرجش م الفرح إلا بعريس..دلوقتي نفس التجمعات بس بالعكس ...تلاقي كل أم قاعده هي و بناتها مراقبين الشباب و ياويله اللي يعدي جنبهم...طارق ..إزيك يا ولد ..مش تيجي تسلم على بنات خالتك شوف بقوا حلوين إزاي؟...أنا مش طارق يا طنط و أنا متهيألي كده حضرتك مش خالتي ...صحيح؟ معلش يا حبيبي العتب ع النظر طب ما تعرفنا على نفسك كده ..يمكن ربنا يحبك و يبقالك نصيب معانا

طبعا الواد يا إما بيطلع يجري ..يا إما حد من صحابه بياخد باله م الكمين اللي وقع فيه ويجي ينقذه على أساس في حد عايزة و كده
طبعا ده غير اللف اللي بيقعدوا البنات يلفوه حوالين العروسة عشان يبقوا واضحين لكل اللي في القاعة من كل الجهات ..و لما بيقف اللف تلاقيهم يزقوا في بعض أو يعملوا انهم بيعدلوا للعروسة فستانها أو طرحتها عشان يطلعوا في الفيديو..و يحاولوا يطلعوا في أكبر عدد ممكن من الصور ..يمكن يعجبوا حد و يتكل على الله و ينتشلهم من عالم الآنسات

الكلام ده كله على فكرة مش المفروض تضحكوا عليه..و الله البنات دول غلابة ..زمان ما كانش مطلوب من أي بنت غير انها تحترم نفسها و تقعد في بيت أبوها و تستنا العدل اللي بيكون في الغالب من إختيار أهلها دلوقتي الكورة بقت في ملعب البنات ..يعني لازم تخرج و تشتغل و تروح أفراح و تزور أصحابها لأن مسؤلية إحضار عريس بقت ملقاه على عاتقها بالكامل ..أنا أعرف حالات كتيرة أهل البنات بيتخانقوا معاهم خناقات لرب السما عشان يخرجوا و يشتغلوا يا إما عمرهم ما هيتجوزوا .. و م الجهة التانية المجتمع في حالات كتير و خصوصا خارج القاهرة و الأسكندرية مابيرحمش أي بنت تخرج مع راجل عشان تتعرف عليه و يمكن يبقى فيه نصيب ..ده غير ان الراجل نفسه في الغالب ما بيرضاش بيها و يقولك عايز واحدة خام لا خرجت و لا اتكلمت مع حد غيري

طب بذمتكوا البنات يعملوا ايه...ده غير العداد اللي بيعد من أول ماتتخرج من الجامعه ...يعني البنت تعتبر بدأت تعنس من أول ما يعدي عليها سنتين أو تلاتة متخرجه و لسه ماتخطبتشأنا شخصيا بدأت أحس اني هاعنس من أول ما كملت 23 سنة..طب نعمل ايه

بصراحة المجتمع المنيل اللي احنا عايشين فيه و اللي بيقيمالبنت بجوازتها واللي تتجوز بسرعة تبقة شاطرة واللي تتأخر يبقى فيها عيب ..و ع الجهة التانية الراجل من حقه ينقي و يتشرط و يبقى مقطع السمكة و ديلها و يتقال عليه مفتح و مدقدق..و يبقى معدي الأربعين و من حقه يتجوز في أي وقت انشالله واحده عندها 18 سنة

المجتمع ده ظااالم و مفتري ..و البنات غلابه و الضغط عليهم بيزيد كل يوم والناس بتحاكمهم على حاجه مالهمش يد فيها

خليكوا معايا بقه ..م المرة الجايه كل بوست هاحكيلكم على بلوة م البلاوي اللي اتقدمولي ..عشان تعرفوا احنا بنستحمل أد إيه

سلام

من طرف **سندريلا** الأربعاء فبراير 13, 2008 5:57 pm

موضوع اكتر من رائع وفكرة رائعة

شكرا ليك يا جندى

من طرف MASTER الأربعاء فبراير 13, 2008 6:37 pm

.
والله معاها حق ...
أنا شفتها فى برنامج العاشرة مساء . بنت تحفة خطيرة
انا شاكر افضالك يا جندى وفى انتظار الحلقة الثانية .
تقبل تحياتى

بجد رائع يا جندى
هات اللى عندك كله ربنا يكون فى العون

من طرف mido zamalek الأربعاء فبراير 13, 2008 10:04 pm

معاك يا عم بس دى للبنات بس

من طرف أبو محمود الأربعاء فبراير 13, 2008 11:09 pm

منتظرين باقي توالي الحلقات يا جندي بعد الحقله الاولى

من طرف el-pop الخميس فبراير 14, 2008 12:04 am

جميله جدا يا جندى المذكرات دى ومنتظرين الحلقات القادمه ان شاء الله

من طرف محمد الجندى الخميس فبراير 14, 2008 12:46 am

طلعت فوق السطوح هز الهوا كمي ...كل البنات اتجوزت و انا قاعده جنب أمي
العريس الأول
عايزه أتجوز بقى

حلو العنوان كده زي ماكان انور وجدي بيقول في "أمير الإنتقام" ..أصل الموضوع كله أصلا تحس انه فيلم عربي ..بس اول موضوع ده كان فيلم هندي و كوميدي كمان

واحدة صاحبتي كانت لسه متجوزة قريب و كنت لسه حاضرة فرحها من أسبوعين ..أتصلت بيا تطمن عليا يعني ..كنت لسه سامعه خبر ان واحده من أصحابنا جابت عريس لواحدة تانية صاحبتنا برضه ..و ده موضوع يضايق قوي على فكرة ..يعني تفضل الواحده تقول و اشمعنى يعني ماختارتنيش أنا و مش بعيد تقاطعها و ماتكلمهاش تاني أبدا

أنا بأه مسكت صاحبتي اللي كانت طالباني في التليفون و قعدت أرصلها ,,شايفة الصحبات ؟..ماطلعش منك انت حاجه زي كده ..أمال مجوزينك ليه؟ مش عشان تشوفيلنا في اصحاب جوزك والا قرايبه حد ينفع ..و كل شوية صاحبتي دي تحاول تقاطعني و تسدني و انا ابدا منطلقه زي الصاروخ ..لحد ماراحت موقفاني بصرخه ..يابت اسكتي بأه جوزي بيسمع م السماعه التانية و عايز يتأكد انك كويسة و رقيقة عشان جايبلك عريس

و في لحظه واحده انقلبت طريقة كلامي 180 درجه و بقيت أرق من أرق واحده تعرفوها ...انتي صدقتي دانا كنت بهزر معاكي..انتي عارفاني رقيقة طول عمري ..دانا أرق م البت اللي طالعه جديد دي اللي اسمها منى زكي ..و اسمع صوت جوزها يحاول يكتم ضحكة ع السماعة التانية و هي حساها بتجز على سنانها و هي بتقوللي عارفه عارفه هو انتي هتقوليلي

المهم اتفقنا على معاد..و لما اقول اتفقنا على معاد يمكن تعدي ع الرجاله سهلة كده يعني ديتها ايه؟ هيستحمى و هيخلي أمه تغسله القميص و البنطلون و أخته تكويهومله و يشغل كل اللي خلفوه عشان طلعة أهله البهية ..لكن في بيت العروسة اللي هيا المفروض انا ..هيييصة ..غسيل للحيطان ..مسح للأرضية..تنضيف للسجاجيد ..تسييق للسلم..تلميع للكاسات ..تنضيف للستاير و الشبابيك ..و بعد ده كله متوقع من العروسة بعد كل المجهود المقندل ده انها تتزوق و نخش عليهم حلوة و بتبرق ..مفهومه بتبرق دي .. عموما البنات هيفهموا لأنهم عارفين موضوع بتبرق دي بتاخد مجهود أد ايه ...

المهم جه المحروس هو و أهله ..هو دكتور على فكرة ..باضرب بطرف عيني كده لقيته لابس لبس ..يا سلاااام ..زي مايكون لم اللي ع الحبل كله و لبسه على بعضه ..و تقريبا كده ماعندهمش مرايا و شكل أمه و أخته عندهم عمى ألوان..البيه لابس قميص أصفر ..بنطلون أزرق ..بلوفر أخضر ..و فوق ده كله كرافته كده الصراحه مش عارفه أحدد بالظبط لونه إيه..لأ و استنوا ..جزمة بني لما اتجعص كده و حط رجل على رجل بصيت لقيت الشراب نبيتي ...آه و النعمة ..قلت في نفسي مش مشكله بيقولوا الراحل مايعيبوش الا جيبه ..و أهو يبقى عريس تكني كلر زي التلفيزيون الملون ..مشرق كده و مقبل على الحياة...هو صحيح ودانه مخاصمه راسه خالص و سنانه بيحبوا بعضهم جدا لدرجة انهم راكبين فوق بعضيهم ..بس خلقة ربنا يعني ..المهم العقل و الشخصية

أول ما بابا دخل راح واقف ..حلو مؤدب يعني و انطلقت امه تعرفه زي مانكون في برنامج..الدكتور سامي ..علاج طبيعي ..قام هو مكمل التقديم و قايل ...و بقلد فنانين....إيه الهبل ده بأااااه ..هو احنا عاملين برنامج مواهب و الا ده جاي يعمل انترفيو في كبارية..بابا برقله كده و قاله آه أهلا و سهلا اتفضلوا و بص لماما بصه معناها إيه اللي انتوا جايبينه ده؟

أنا قاعده و ماسكه نفسي م الضحك و ده منطلق بيتكلم على صولاته و جولاته في عالم التقليد و احنا قاعدين نبص لبعض و امه شكلها منشكح أوي من كلامه ..و فجأة بص في الساعة و بص لبابا ..بابا خاف ليطلبني دلوقت و هيبقى موقف محرج أول مرة يتعرضله..لكن ده قاله ..عمي ممكن أسألك حضرتك سؤال و تجاوبني بصراحة؟..بابا قاله بخوف كده خير يا بني؟..قاله هو التلفزيون ده شغال ؟..بابا فوجئ كده و قالله آه يابني شغال ..فجأه الحليوة ده راح قايم و فاتح التلفزيون و قعد يقلب في القنوات لحد ما جاب قناه كانت بتزيع ماتش للزمالك..و احنا قاعدين مذهولين و مش قادرين نعمل حاجه و امه قاعده منشكحه زي ما هيا..و هوب و صوته علي ..شوت يا عم ..أيوة كده ..يااااه ..الحكم ده حمار بن كلب ...واحنا قاعدين ..ماما حبت تحرجوا بالذوق كده و قالتله ..و الله يا دكتور انا مش عارفه انت ازاي بتابع الكورة دي اليومين دول ..ده حتى الزمالك بقاله مده مش كويس خالص

الواد فجأة سكت و لف كده لماما بالتصوير البطئ..و عينيه احمرت لدرجة ان ماما كشت في مكانها ..و ده راح رافع الجعورة ..لاااااا ..بقولك ايييييه ..إلا الزمااالك ..اتكلمي براحتك على أي حد ..على امي على أبويا عليا أنا شخصيا لكن الزمالك لألألأ ..فاهمه ..قومي يا ماما ..أنا لا يمكن أدخل بيت الزمالك بيتهان فيه

يابن 60 في 70..أكن احنا معديينلك البلاوي اللي انت لابسها و السخافات اللي عمال تقولها عشان تبقى أخرتها كده ؟....كلنا فضلنا متسمرين مكاننا بابا يبص لماما و مش قادرين حتى يقوموا من مكانهم وانا الأول اتحرق دمي و بعدين وقعت ع الأرض من كتر الضحك..هم يبكي و هم يضحك

الجميل بأه ان صاحبتي جايه تاني يوم تسألني على رأيي قولتلها لأ طبعا انتي بتستهبلي ..و حكيتلها ع اللي حصل..لقيتها بتقول طب و ايه يعني؟ عادي ماتبقيش بس تقوليله انك أهلاوية..و لما أصريت ع الرفض..صاحبتي دي قاطعتني و ما رفعتش عليا سماعة التليفون من يوميها ..إزاي يعني أرفض عريس لقطة زي ده؟

صحيح إزاي؟

من طرف el-pop الخميس فبراير 14, 2008 1:03 am

الواد فجأة سكت و لف كده لماما بالتصوير البطئ..و عينيه احمرت لدرجة ان ماما كشت في مكانها ..و ده راح رافع الجعورة ..لاااااا ..بقولك ايييييه ..إلا الزمااالك ..اتكلمي براحتك على أي حد ..على امي على أبويا عليا أنا شخصيا لكن الزمالك لألألأ ..فاهمه ..قومي يا ماما ..أنا لا يمكن أدخل بيت الزمالك بيتهان فيه

ههههههههههههههههههههههههههههههههههههههههههههههههههههههههههه
بص يا جندى انا مبطلتش ضحك من ساعه ماقرأت تالموضوع لحخد دلوقتى والله العظيم ايه العريس المتخلف ده جى يتفرج على الزمالك فى بيت العروسه والله عجب
وشكرا يا جندى مستنين بقيه الحلقات ان شاء الله

من طرف محمد سند الخميس فبراير 14, 2008 3:51 am

العروسة ساكنة في ميت عقبة ولا ايه يا جندي ؟

ههههههههههههههههههههههه

مش هقاطعك كمل ومتابعك وهقول رايي اخر القصة بالتفصيل الممل كعادتي

من طرف hoss65 الخميس فبراير 14, 2008 7:18 am

احنا فى انتظار التكملة
متتأخرش علينا

من طرف **نور الاسلام** الخميس فبراير 14, 2008 9:38 am

بجد جامده كمل يا جندى

مذكرات بنت عايزه تتجوز(الحلقه20)عقبالك يوم ميلادك

مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك

رد: مذكرات بنت عايزه تتجوز(الحلقه20)عقبالك يوم ميلادك