من حكاوى أصحابى الأنتيم ...قلبى مش عاجب عقلى

من طرف hoss65 الأربعاء يناير 02, 2008 3:09 pm

الساعة عشره مساء على قهوه فى ميدان الجيش وانا قاعد مستنى صاحبى الى اتصل على وقلى اشوفك ضرورى لحسن جأتجنن .
اتنين سحلب وواحد ينسون ده صوت الى بينزل الطلبات وواحد حلبه حصى علشان الباشا (يقصدنى أنا ) وطبعا بحركه لاإراديه حطيت رجل على رجل وعدلت الجاكته .
اهه صاحبى جه خليهم بقى اتنين حلبة .
انا : اهلا ايه الى خلاك تجيبنى على ملا وشى الساعه دى .
صاحبى : انا ح اتجنن خلاص مش قادر استحمل لازم اتكلم مع حد واحكيله .
انا : قول احكى حصل ايه .
صاحبى : شوف ياسيدى انا ليه اكتر من اسبوع وانا بأشوف فى الحلم حاجه غريبه قوى كل يوم ومش عارف لها تفسير .
انا : اللهم أجعله خير شوفت أيه .
صاحبى : بشوف قلبى بيتكلم مع عقلى وبيتخانقوا مع بعض
عقلى : إنت دايما كدة جايب لى المشاكل .
قلبى : إنت إلى مش فاهم ان دى حاجات خارجة عن إرادتى .
عقلى : يعنى فاكر لما شفت بنت حلوه عندها 20 سنة وعنيها جميله وقعدت تدق تدق وخليت صاحبنا ( على صاحبى طبعا ) يروح ويخطبها ؟ والناس قالوا عليه الراجل الشايب أتجنن شفت وجبت لى الشتيمه .
قلبى : لا إنت إلى قعد يفكر بيك لحد ماقرر أنه يروح يخطبها دى مش غلطتى .
عقلى : وكمان لما شاف واحد مسكين وغلبان وانا فكرت وخليته يحط أيده فى جيبه وأرسلت إشارات لإيدة تدخل جيبه وتديله جنيه وقالوا الراجل ده قلبه طيب يعنى الوحش لى والحلو ليك
قلبى : مانت كمان لما شوفت خناقه بتخاف وبتفكر فى الهروب على طول وبيقولوا عليه قلبه خفيف وخواف .
انا : يعنى ايه الكلام ده انت منزلنى من البيت الساعه دى علشان تقولى قلبى وعقلى وحلم ومش عارف ايه ابقى اتغطى كويس قبل ماتنام .
صاحبى : لا صحيح دى مشكله انهم مش متفاهمين .
انا : انا ماشى .... آل مش متفاهمين قال .... سلام .... إبقى حاسب بقى عل المشاريب.

( ياترى انتم كمان زى صاحبى قلبكم وعقلكم مش متفاهمين ؟؟؟؟؟؟)