اعتذار ...للمعلم حسن شحاتة

من طرف hoss65 السبت فبراير 02, 2008 9:44 am

سايق عليك النبى تسامحنى يا معلم
انا اللى كنت كل يوم بتكلم
شككت فيك وجرحت فيك وانت يا عينى بتتألم

عملت روحى خبير
وطلعت فى برامج كتير
لابس حرير فى حرير
سادة على مقلم

وكتبت مانشيتات
وقلت فى الفضائيات
شيلوا المعلم

وانت اتاريك كبيرسبتنى
اتكلم فى كل حتة
رديت عليا انت
سنة الفين وستة
وخدت الكاس يا معلم
خليتنى قاعد ومبلم

جيت اصطادك صدتنى
وبينى وبينكم فرحتنى
ويا ريتنى بتعلم

سمحنى يا معلم

لسانى السبب لو ينقطع من لغاليغو هايريحنى
لوقلت مش هازعل ابدا اصله فاضحنى
خلانى مكسوف من روحى وعايش محنى

خلانى اهاجمك يا معلم
وحياة كريم لتسامحنى يا معلم

انا اللى قولت عليك بتكسب بدعا الوالدين
ولو كسبت واحد اقول ليه مكسبش اتنين
مسكتلك على الواحدة قبل غانا بشهرين
لو لعبت متعب اقول عمرو ذكى فين
ولو لعبت زيدان اقول ابو تريكة فين
لو لعبت 3-2-5 اقول لازم يلعب 4-4-2
ولو لعبت بيها اقول لازم يلعب 3-5-2

وكل ده وسبت اللى يلتو يلتو
لغاية ما فجأتنى وفجأة صمويل ايتو

خليت الشبكة بتتكلم
خليت اتوفيستر يتـألم

وفى ماتش السودان
نزلت ابو تريكة الفنان

جاب جونين لذة
وكمنه مع غزة
عملولوا بوليكا
من غير ما يتكلم

معرفش هاجمتك ليه مع انك ابن مصر
وكل يوم بتجيب لولادى احلى نصر

ارجوك يا لسانى ما تهزأنيش
وقفت حالى وخليتنى مش عارف اعيش
اعيش ازاى لو المعلم ما سمحنيش

سايق عليك النبى تسامحنى يا معلم
ولو غلطت تانى قطعنى يا معلم

واوعدك اقف جنبك انا وقلمى
ومن دلوقتى اقف وراك اشيل علمى

لانى عرفت انك اسطورة
وقريت تاريخك فى الكورة
عرفت كمان انك عمى

وقبل ده كله انت المعلم
وحياة ابوك لتسامحنى يا معلم