أه يا زمن السكات

من طرف محمد الجندى الخميس يناير 24, 2008 9:14 pm

عيُون بتشُوف وقلوب بِتدمع
ولسان ملفوف وودان بِتسمع
وكلام ملهوف مش قادر يِطلع
وناس ملِيها الخوف والخوف بِيوجع
كتبنا نشيد من الاهات
اه يا زمن يا زمن السُكات
الي بيموت بيندفن
وبنعرف انه مات
بس الي بيسكت
بيندفن جوا الحياة
اه يا زمن يا زمن السكات
ليه يا وطن بقينا اغراب عنك
لا حسينك مننا ولا بتحسِنا منك
شايفنك بتتحرق وعاملين مش فاهمين
شايفنك بتتسرق وعاملين مش شايفين
الغُرب بقوا اهلك طب واحنا نبقى مين!
واطفالك لم تكبر وتسألنا يوم عنك
يا ترى حنقلها انك خيبت ظننا
ولا احنا اللى مخيبين ظنك
بقينا اهرام من العيون المرعوبة
ايامنا على حيطانها بلغة الصمت مكتوبة
الي بيموت بيكتبوا اسمه على طوبه
وبنعرف إمتى مات
بس الي بيُسكت
بيتنسى جوا الحياة
اه يا زمن أه يا زمن الســــكات