انا والبهايم واليوم الطويل !!

انا والبهايم واليوم الطويل

أصحى اصلى الفجر وأصحِى عيالى
قومى با بت احلبى وجهزى فطارى
اجمع ولملم عدتى وحاجاتى
دا احنا قدامنا يوم طويل
ربنا يعينى ياأم عيالى ويعينك
أركب حمارتى وعالغيط طوالى
اسحب بالسلبة جموستى واقولها يلا
وهى تقول مانا ماشية بلا غلبه
بفهم كلامها ماهو بردو كده عِشره
والست ماشية جنبى وعنيها عالطريق
شايله زادنا وزوادنا وسكرى وشايى
اقولها انزل وتركبى احنا مشوارنا طويل
لا دانت عاوز الناس تقول مبقاش فيه اصول
اوصل غيطى اربط بهايمى فى المربط
واجمع لهم رزقهم ماهم بردو راس مالى
احس بيهم لو ساعة كده جاعوا
صراخ وعويل ومظاهرة !!!!!!!!
اجرى واجمع لهم رزقهم من تانى
لانهم معندهمش صبرنا احنا البنى آدمين
بس والله شغالين شغالين
ما فى يوم قالو احنا قاعدين
ولا اجازة احنا واخدين
عارفين حمارى ده
بيفهم ولا اجدعها فهيم
بنظرة وطبطبة من غير عصاية
وأشيله على ضهره اناطير
ما فى يوم قالى مش شايل
ولا انا زهقان ولا الحالة طين
دا حمار محترم زين الحمير
والله دا باين يومنا طويل
اسحب تريتى واروح عالزرع الجميل
يارب اكرمنى فيه
من السنة للسنة بنبأى منتظرين
طرحك وفولك وقمحك وكرمبتين
هو ده رزقنا يا متعلمين
ادق فى الارض بقى دقتين
ابدا باسم الله الرزاق المعين
انضف فيكم يا زرعى وارضى حبتين
اخلى ضوء الشمس يسرح فى جدورك
اصل نور الشمس ياخونا هو
حياة الزرع مع شوية ميه من حين لحين
تعدى ساعات وضهرى متنى شويتين
تيجى الست تقولى مش ناوى تاكل
وتأيلك الساعه ديا
الشمس حاميه عليك يا زين
جهزى غدانا وان هنده على جارنا
يبو محمود تعال شاركنا لقمتنا
لاجل يبارك فيها رب العالمين
كيفك يبو محمود يا جارنا ونسيبنا
والله الارض غلبانى والغلا تاعبنا
نعمل ايه فى شكارة ملح كانت بتساعد
فى الارض ما عارفين نجيبها
ارمى تكالك على اللى خلقك
بردو ربك ما سايبنا وقول
حسبى ربى فى اللى عامل كدا فينا
دا يومنا طويل مد ايدك وكل
بكره ربك يحلها من عنده
شفت البهايم لما تجوع تزعق
وصوتها يعلى لفوق
واحنا بشوية المش هناكل
ونسكت وربك بقى يعينا
اكلنا وسرحنا كل واحد فى همه
مش بقولكم دا يومنا طويل
بس يا رب ديمها علينا نعمة .

بقلم .. MASTER

ماستر سامحني انا لسه داخل البيت الساعة واحدة وسند علمني السهر بره البيت
معلهش قصيدتك او خواطرك ولا اجمل ولا اروع
انصحك لو كنت طالب فعليك بتنمية مهاراتك وعليك أن تمسك في اي فرصه او مسابقة شعريه لتظهر مواهبك
مستر أنت موهبه شابه جديرة بالاهتمام
بارك الله فيك
قولي لما تخطب او تغلط زينا وتتزوج هتكتب ايه فيما من تحكمك ههههههههههههههههه

اذا اقبلت على تلك الخطوة المميته ( الزواج ) ارجوك راجع كتاب جحا في الزواج
الكتاب من كلمتين مفيهوش صفحات

أبو محمود كتب:اذا اقبلت على تلك الخطوة المميته ( الزواج ) ارجوك راجع كتاب جحا في الزواج
الكتاب من كلمتين مفيهوش صفحات

ان شاء الله بس لما يقدر الشباب على الزواج سوف اجلس على باب المنتدى اوزع كتابك هذا
المشكلة يا ابومحمود كيف سيتزوج الشباب وهم لا يستطيعون حتى الصراخ

Excellent