الشاعر ...بيرم التونسى

من طرف hoss65 السبت مارس 08, 2008 12:26 pm

عمنا - بيرم التونسي

محمود بيرم التونسي هو شاعر مصري من أصل تونسي ولد في الإسكندرية في 3 مارس 1893، و يعدّ من أشهر شعراء اللهجة المصرية من اللغة العربية. سمي بالتونسي لأن جده لأبيه كان تونسيا. غنّت له أم كلثوم عدة قصائد وتوفي 5 يناير 1961 عن سن يناهز 69 عاماً وذلك بعد معاناته من مرض الربو. بيرم التونسي : (1893- 1961)

ولد الشاعر الشعبي محمود بيرم التونسي في الإسكندرية في 3 مارس 1893م ، وسمي التونسي لأن جده لأبيه كان تونسياً ، وقد عاش طفولته في حي شعبي يدعى " السيالة " ، إلتحق بكُتّاب الشيخ جاد الله ، ثم كره الدراسة فيه لما عاناه من قسوة الشيخ ، فأرسله والده إلى المعهد الديني وكان مقره مسجد أبي العباس ، مات والده وهو في الرابعة عشرة من عمره ، فانقطع عن المعهد وارتد إلى دكان أبيه ولكنه خرج من هذه التجارة صفر اليدين .

كان محمود بيرم التونسي ذكياً يحب المطالعة تساعده على ذلك حافظة قوية ، فهو يقرأ ويهضم ما يقرؤه في قدرة عجيبة ، بدأت شهرته عندما كتب قصيدته " بائع الفجل " التي ينتقد فيها المجلس البلدي في الإسكندرية الذي فرض الضرائب الباهظة وأثقل كاهل السكان بحجة النهوض بالعمران ، وبعد هذه القصيدة انفتحت أمامه أبواب الفن فانطلق في طريقها ودخلها من أوسع الأبواب .

أصدر مجلة المسلة في عام 1919 م وبعد إغلاقها أصدر مجلة الخازوق ولم يكن حظها بأحسن من حظ المسلة .

نفي إلى تونس بسبب مقالة هاجم فيها زوج الأميرة ( فوقية ) ابنة الملك فؤاد ، ولكنه لم يطق العيش في تونس فسافر إلى فرنسا ليعمل حمّالاً في ميناء ( مرسيليا ) لمدة سنتين ، وبعدها استطاع أن يزوّر جواز سفر له ليعود به إلى مصر ، فيعود إلى أزجاله النارية التي ينتقد فيها السلطة والاستعمار آنذاك ، ولكن يلقى عليه القبض مرة أخرى لتنفيه السلطات إلى فرنسا ويعمل هناك في شركة للصناعات الكيماوية ولكنه يُفصل من عمله بسبب مرض أصابه فيعيش حياة ضنكاً ويواجه أياماً قاسية ملؤها الجوع والتشرد ، ورغم قسوة ظروف الحياة على بيرم إلا أنه استمر في كتابة أزجاله وهو بعيد عن أرض وطنه ، فقد كان يشعر بحال شعبه ومعاناته وفقره المدقع . وفي عام 1932 يتم ترحيل الشاعر من فرنسا إلى تونس لأن السلطات الفرنسية قامت بطرد الأجانب فأخذ بيرم يتنقل بين لبنان وسوريا ولكن السلطات الفرنسية قررت إبعاده عن سوريا لتستريح من أزجاله الساخرة واللاذعة إلى إحدى الدول الأفريقية ولكن القدر يعيد بيرم إلى مصر عندما كان في طريق الإبعاد لتقف الباخرة التي تُقلّه بميناء " بور سعيد " فيقف بيرم باكياً حزيناً وهو يرى مدينة بور سعيد من بعيد ، فيصادف أحد الركّاب ليحكي له قصته فيعرض هذا الشخص على بيرم النزول في مدينة بور سعيد ، وبالفعل استطاع هذا الشخص أن يحرر بيرم من أمواج البحر ليجد نفسه في أحضان مصر .

بعدها أسرع بيرم لملاقاة أهله وأسرته ، ثم يقدم التماساً إلى القصر بواسطة أحدهم فيعفى عنه وذلك بعد أن تربع الملك فاروق على عرش مصر فعمل كاتباً في أخبار اليوم وبعدها عمل في جريدة المصري ثم نجح بيرم في الحصول على الجنسية المصرية فيذهب للعمل في جريدة الجمهورية ، وقد قدّم بيرم أعمالاً أدبية مشهورة ، وقد كان أغلبها أعمالاً إذاعية منها ( سيرة الظاهر بيبرس ) و ( عزيزة ويونس ) وفي سنة 1960م يمنحه الرئيس جمال عبد الناصر جائزة الدولة التقديرية لمجهوداته في عالم الأدب . ولكن مرض الربو وثقل السنين يتمكنا من شاعرنا ليتوفى في 5 يناير 1961م .

غنّت له أم كلثوم عدة قصائد مما ساعد على انتشاره في جميع الأقطار العربية ، وظل إلى آخر لحظة في حياته من حملة الأقلام الحرة الجريئة ، وأصحاب الكلمات الحرة المضيئة حتى تمكن منه مرض الربو وثقل السنين فيتوفى في 5 يناير 1961م بعد أن عاش 69 عاماً

من أشعاره

*************

ياهـــــل المغنـــى
غاندي
الشــــــــــــ ــرق
من كلمـــة هايفـــه
القلب يعشق كل جميل
الفــــــــلاح

من طرف hoss65 السبت مارس 08, 2008 12:27 pm

ياهـــــل المغنـــى

يااهل المغنى دماغنا وجعنا

دقيقه سكوت لله

داحنا شبعنا كلام ماله معنى

ياليل وياعين ويااّه

طلعت موضه غصون وبلابل

شابط فيها حزين

شاكى وباكى وقال موش عارف

يشكى ويبكى لمين

واللى جابت له الداء والكافيه

طرشه ماهش سامعاه

يااهل المغنى دماغنا وجعنا

دقيقه سكوت لله

ردى عليه ياطيور بينادى

وارمى له الجناجين

وانت كمان يابور الــــوادى

قل له رايح على فين

قل له اياك يرتاح يابابـــــوره

ويريحنـــــــــ ـا معــــــاه

ياهل المغنى دماغنا وجعنا

دقيقه سكــــــوت لله

كل جدع فرحان بشبابه

يقول فى عنيه دمـــوع

ياللى جلبتى شقاه وعذابه

حلّى لنــــا الموضــــوع

طالع نازل يلقى عـــــوازل

واقفــــــــه بتستنــــــاه

ياهل المغنى دماغنا وجعنا

دقيقه سكوت لله

حافضين عشره اتناشر كلمه

نقل من الجـــــــــورن ال

شوق وحنين وأمل وأمانــــــى

وصد وتيـــــــه ودلال

واللى اتعـــاد ينزاد ياخــــــــــوا نا

وليل ونهــــــــار هـــوّاه

ياهل المغنى دماغنا وجعنـــــــا

دقيقه ســكوت لله

من طرف hoss65 السبت مارس 08, 2008 12:28 pm

غاندي

الســلام لك والسلامه
من هنا ليــوم القيامــه
ياللى أظهرت الكرامـــه
بعد عهد المرسليـــــن

ياللى من لعبك بمغــزل
تطلع البورصات وتنـــزل
فوق دماغ لندن وتعــزل
لا نكشــــير الغزالـــــين

فيلسوف مايخيبش قولك
كل فلسفتك فى نوــــك
والتلاميذ اللى حولـــــك
بالمكاكيـــــك شغاليـــــــن

لنجليز عايشين فى لــــذّه
عندهــم أسطــول وعــــزّه
وانت تضربــــــهم بمعـزه
سوده بنت اربـــــع سنين

من هنا تيـــجى المقالـــــب
اللى مغلوب يبقى غالـــــب
واللى مطلوب يبقى طالب
والهزيل ياكـــــل الســـمين

قول بدل بفتيــــــــــك وبيرى
يطبخوا بســـــيرج بابــــــورى
والبودنج ان كان ضــــــرورى
ياخدوا حته من العجـــــــــين

لا نجليــــز تاخد ما تـــــــــــدّى
بالحفــــــــــ ـان من كل هنـــدى
واتنبـــــح صوتك ياغانــــــــدى
ماالتقيـــــتش المنصفـــــــين

قول مادام الحـــــق ضايــــع
والغرض بيــــــــع البضـــــايــع
الحرام ســــاتر وســــــــايـــ ع
ولا نمـــــــشى عريانــــــــــ ــين

يخضعـــــوك ليه للتجــــــــــا ره
ونت فى أرض الحــــــــــــ ـراره
كل قرش يروح خســــــــــــا ره
فى الزفيـــــــر والنفتالــــــي ن

كل واحــــــد عنـــــــده معــــــده
ماســـــكه روحه خدها قاعــــده
ان طمع تخـــــــلق له أعـــــــــدا
يقعـــــــــــد وا له مرصصــــــــين

عالقضــــيب والقطر ماشـــــى
يصــــــبح العصيان بـــــــلاشى
ون عملهــــــــــا ومااكتفاشـــــى
يبقى يــــــــــاكل عزرائيـــــــــ ــن

ولا ياكــــــــل م المنــــــــــا جم
فحــــم به ع الدنيا هاجــــــــــــ ـــم
واللى به داس ع الجماجـــــــــ م
أحيـــــــا ولا ميتــــــــــــ ـــــين

يازعيــــــــــ م الهـــــند صومـــك
حبّب العــــــــــال م فى قومــــك
وانتهت حجّـــة خصــــــــومـــ ــك
اللى باتــــــــــــ ـوا ملبــــــــوخيـ ـن

كلهـــــــــم واقعــــــين فى حيــــره
يعقـــــــدوا جلســــــــــات كبيــــــره
فوق موائــــــــد( مستديـــــــره)
يعنــــــــى لســــه محلقـــــــين

يغضب الحاكـــــــــم لنصحـــــــــك
يحبســـــك ويعود يصالحــــــــــ ــك
وانت تستعجب وتضحـــــــــــ ــــــــــك
عالجبــــــــــ ـابره القحطانـــــــي ن

يحسبـــــوك طالــــــــب جرايــــــــه
ترعـــــــبك هزة عصــــــــــايه
يلتقـــــــــوك ياغانــــــــــ دى اّيه
فى الجهـــــــــــ ــاد صايم سجين

كام زعيــــم فى الدنيا مثـــــــلك
يرضى يــــــاكل زى أكلـــــــــــك
ولا يلبس زى شــــــــــــــ ــــكلك
كلّهم متحفلطـــــــــ ـــــــــــين

اللى بـــــات ناصب مشـــــــــــــ ـانق
واللى خايـــــــف م الشــــــــــــ ـرانق
واللى اهـــــــــو بايت يعانــــــــــق
واللى قدامــــــه الطحــين

من طرف hoss65 السبت مارس 08, 2008 12:29 pm

من كلمـــة هايفـــه

مــن هفــوه أو كلمــه هايفــــه نتحمــق ونقــــوم

نســب ونــدب ، ويـــــدور العــــــراك بالشــــــــوم

وكل محمـــوق ولــه فرقـــــــه تقــوم بهجــــــــــوم

مــن قبـــل ماتعـــرف الظالـــم مــن المظلــــــــــ وم

تبقــى الشـــراره حريقــــه والسحابـــه حســــوم

لا شركـــه تنجــح ، ولا عيـــله صفاهـــا يـــــــدوم

ومنــين نشـــوف العـــدل ولا السفينــــــه تعــــوم

مادمنـــا فــوق قلبــــها قاعديــن لبعض خصـــــوم

تضحــــك عليـــنا الحــدادى فى السمــا بتحــــوم

من طرف hoss65 السبت مارس 08, 2008 12:30 pm

الفــــلاح

الأوله آه والتانيه آه والتالته آه

الأوله عيرونى . إن نا فلاح

والتانيه أزرع وأقلع اللى نام وارتاح

والتالته آه للى أحبه شط منى وراح

الأوله عيرونى ان نا فلاح – بدفيه

والتانيه أزرع وأقلع اللى نام وارتاح – فى دهبيه

والتالته آه اللى أحبه شط منى وراح – فى صبحيه

الأوله عيرونى ان نا فلاح بدفيه – وعيشى حاف

والتانيه أزرع وأقلع اللى نام وارتاح فى دهبيه – بمقداف

والتالته آه اللى أحبه شط منى وراح فى صبحيه – ما قال لى عواف

الأوله مش بإيدى دا قضا محتوم

والتانيه ومسيرها ناس تغرق وناس حتعوم

والتالته ميت هم يرحل ألف هم يدوم

الأوله آه والتانيه آه والتالته آه

من طرف hoss65 السبت مارس 08, 2008 12:30 pm

المجلس البلدي

قد أوقع القلبَ في الأشجانِ والكمدِ

هوى حبيبٍ يُسمّى المجلس البلدي

ما شرّد النومَ عن جفني سوى

طيف الخيال، خيال المجلس البلدي

***

.. حتى يقول

كأنّ أمي أبلّ الله تربتها

أوصت فقالت: أخوك المجلس البلدي

أخشى الزواج، فإنْ يومُ الزواج أتى

يبقى عروس صديقي المجلس البلدي

وربما وهب الرحمن لي ولدًا

في بطنها يدّعيه المجلس البلدي

يا بائع الفجل بالمليم واحدةً

كم للعيال؟ وكم للمجلس البلدي؟

من طرف hoss65 السبت مارس 08, 2008 12:31 pm

أم خليل

في حارة القدرة دلالة اسمها أم خليل
50 سنة عمرها لكن من المناغيل
وراها قنطار شغت شايلاه وهم تقيل
بالاختصار لما تمشي تفكرك بالفيل

والبرقع اللي على الخشم العريض محطوط
بالصنعة والفن فوق كرسي الخدود ممطوط
ما يظهر الا عيون متكحلة وخطوط
ويخفي داهية حنك واسع وصدغ طويل

الست دي يوماتي تفوت م الصنادقية
وتحب واد خردجي جنب المناخلية
تنظر لها م الدكاكين الصنايعية
يتجننوا الكل لما تنقصع وتميل

واحد يقول للي جنبه : بص يا سيدنا
يرد دوكهات يقول يا رب تسعدنا
ونزور مقامهم وتسعدهم وتسعدنا
آدي الحريم التمام آدي اللي منه قليل

إيش قولكم الناس دي ربت للمرة وسواس
وخمنت نفسها ست النسا والناس
تفوت عليهم وتسمع دي المديح تحتاس
وتحزق الخصر وتقرط على الزنبيل

إن كح واحد تقول قصده يشاغلني
وان تف راخر تقول عايز يقابلني
وان بص راجل تقول مالك حاتاكلني
أما اللي يضحك دا يبقى في هواها قتيل

يوم رايحة للخردجي بالقيمة والحشمة
وهيه بين المفارق ماشية ف الزحمة
أتاها شيال لا زوق عنده ولا رحمة
غرف له غرفة من الحلة وقال يا رحيل

حست بدي البهدلة بصت وراها قوام
ما تلقى في السكة غير واحد أفندي تمام
نزلت على خلقته أربع خمس أقلام
اتلمت الخلق حماره على مصاطيل

قال الأفندي : إيه جرى يا ست ؟؟!!
والله إيدي ماجات يمك ولا حسست
قالت : وانا ما اتعميت لسة ولا هلوست
يلعن أبوك دون قبيح طور بن كلب رزيل

قال واد هناك عربجي : في السجن تقييده
يعني الافندي القبيح إيه اللي حايفيده
أنا اللي شايفه تمام لما تنى إيده
وقال عمل حجته بيطلع المنديل

بقى الجدع اللي متعلم وإبن ذوات
في وسك كبشة غجر أولاد بلد قفوات
لولا وقف من سكات كان كلها لما مات
لحد ما راح بعيد عن دي الخناقة ميل

وان كنت تعرف يا سيد خصلة النسوان
وعالخصوص المرة الوحشة أم خلقة دهان
تعمل ولو بالفضيحة في البلد اعلان
عن نفسها ، والغرض تتهم في شاب جميل

لجل اللي عايزاه يغير حالاً ويخطبها
ويقول خلاص يا ولد دي الناس بترغبها
وان حد غازلها تعطي له شبشبها
ومن هنا تلتقي حاجة اسمها التغفيل

من طرف hoss65 السبت مارس 08, 2008 12:32 pm

يــــا مصـــــر
يا مصر تتحدث الأملاك بجمالك
فى وحى جبريل
من قبل فرعون وموسى الشمس ضاحكالك
فى صفحة النيل
حسنك لوحدك لانسوانك ولا رجالك
من جيل ورا جيل
ــــ
فى وحى جبريل قصايد واسمها سينا
منقوشه بالنور
فى صفحة النور مزايا للحياه زينه
قدامها جمهور
من جيل ورا جيل ومن خوفو ورا مينا
وكل طرطور
ــــ
منقوشة بالنور قراها سيد الإسلام
بأمـــــره مولاه
قدامها جمهور على ذكر الجلاله ينام
والأمــــــر لله
وكل طرطور بقبه أو بنى أهــرام
والكل سايعاه
ــــ
بأمره مولاه محمد عالجمال وصى
حاكم ومحكــــوم
والأمر لله وجتى فى الخلف غصه
تتمـــــد وتدوم
والكل سايعاه وله من رأفتك حصه
آه عللى محروم

من طرف hoss65 السبت مارس 08, 2008 12:33 pm

الجماهير

م المستحيل إنت تخدع أي طفل صغير

و تلف عقله و تعطيه القليل بكتير

لكن بأهون طريقه تخدع الجماهير

لو كنت أغبى غبي تجري وراك و تسير

* * *

خليل يصقَّف, يصقف شعب ويا خليل

من غير ما يسأل عن الأسباب والتفاصيل

* * *

و حمار يغني, وجايب من يقول له: آه

حالاً تقول الخلايق كلها ويّاه

* * *

الحق يخفى وفي وسط الزحام ينداس

وناس في فهم الحقيقه, تتكل على ناس

ويساعدك الحظ ياللي تحسن التجعير

من طرف hoss65 السبت مارس 08, 2008 12:34 pm

الصنم

هبط الجنيه من قمّته و المليونير : ضج و لطم

و لما تهبط ذمته الحزن ينساه و الألم

و لما تسقط حرمته يظن روحه محترم

عنده الجنيهات كل شيء و كل شيء غيرها عدم

* * *

أما الفقير قام و استجار و من الهلع قلبه انخلع

بايت يفكر .. ليل نهار ليرتفع سعر السلع

و اللحمه اهيه و الخضار أسعرها حتسوق الدلع

ياما الجنيه رخّص رجال و غَلىَّ أسعار الغنم

* * *

دي جيفه منتنه صار ابن آدم عبدها

فليسقط الصنم الجنيه اللي بتسجد له الأمم

خطاب إلى الموميه

في مصر كنت الملك لك جيش ولك حاميه

ودوله غير دولتك ما تعمل الموميه

و امه غير امتك ما تزرع الباميه

ولما خشوا عليك المقبره يلاقوك

نايم مفتح .. ولكن في بلد عـميه

من طرف hoss65 السبت مارس 08, 2008 12:35 pm

عتاب

ليه امشى حافى ،وانا منبت مراكيبكم
ليه فرشى عريان،وانا منجّد مراتبكم
ليه بيتى خربان ،وانا نجّار دواليبكم
هى كده قسمتى؟
الله يحاسبكم!

ساكنين علالى العتب،وانا اللى بانيها
فارشين مفارش قصب،ناسج حواشيها
قانيين سواقى دهب،ونا اللى ادور فيها
يارب ماهوش حسد
لكن بعاتبكم

من الصباح للمسا،والمطرقه فيدى
صابر على دى الاسا ! حتى نهار عيدى
ابن السبيل انكسى ، واسحب هرابيدى
تتعروا من مشيتى
واخجل اخاطبكم

ليه تهدمونى وناللى عزكم بانى
انا اللى فوق جسمكم قطنى وكتانى
عيلتى فى يوم دفنتى مالقيتش اكفانى
حتى الاسيّه وانا راحل وسايبكم؟

بدنجان

يا شرق فيك جو منور

والفكر ضلام

وفيك حراره يا خساره

وبرود اجسام

فيك تسعميت مليون زلمه

لكن اغنام

لا بالمسيح عرفوا مقامهم

ولا بالاسلام

هي الشموس بتخلي الروس

كدا هو بدنجان

من طرف hoss65 السبت مارس 08, 2008 12:36 pm

الشــــــــــــ ـــرق

*************

من قبل مااكتب أنا عارف القــــــول ضايــــع

والأجــر بالتأكيد ذاهــب حسب الشـايـــــع

والشتــم حايجينى مسوجر من واد صـــايــع

مهما انكويت بالنار والزيـت برضــك فنــــــــان

************

يا مصرى وانت اللى هاممنى من دون الكل

هزيـــــل ويحسبك الجاهــــل عيّان بالسـل

من دى الكيــوف اللى تصبّر على كثر الذل

ونمــت والعالـــــم فايـــــــق قوم بص وطـلّ

وشوف الشعوب واتغص ودوب وارجع انسان

*********

واللى اّلمـــــنى وبكّـــــانى انت ياشــــامى

ع الأكل نازل طول عمــرك بارد حـــــــامى

وقـــلت لى لمّا نهيتــــــك مصرى حـــرامى

لحـــد ماالجزّار خــــلاّ جرحـك د ا مــى

والله الخروف سايب معلوف مايفوته جعـــان

*********

والمغـــربى المسلم راخر أبو زر فاشـــــوك

لما انتقدتــه فزع قــال لى يلعن .... بــــوك

ونا اللى قصدى أشوف قيده ...يصبح مفكوك

لقيته فرحـان به راضـــــى طيّب .. مبـروك

خليك فقيــر دق البنديـــر وكل التغبــــان

*********

روح العراق راخر قول له كيف الأحـــــــــــ ـوال

لامتى تفضل يا أخيينــا بحزام وعقــــــــــــ ال

ما تعرف الجاز بستعمـل غير للمشعــــــــــ ـال

ألطــم بقى وقول ويّايــا الجاز أمـــــــــــــ ـوال

واوعى المداس يفلت تحتاس وتقول لى أمان

***********

يا شرق فيك جــو منّـــــور والفكر ظـــــــــلام

وفيــــــك حراره ياخسـاره وبرود أجســــــــام

فيـــك سبعميت مليون زلمه لكن أغنــــــــــــ ام

لا بالمسيح عرفوا مقامهم ولا بالاســــــــلا م

هى الشموس بتخللى الروس كداهو بدنجـان

من طرف hoss65 السبت مارس 08, 2008 12:37 pm

القلب يعشق كل جميل

القلب يعـشق كـل جميل ,,,,,وياما شفت جمال يا عين
واللي صدق في الحب قليل,,,,,وإن دام يدوم يوم ..ولايومين
والـلـي هـويته اليوم,,,,,دايـم وصـــالــه دوم
لا يعاتـب اللي يتـوب,,,,,ولا في طـبـعـه الـلـوم
واحــد مفيـش غيره,,,,,مــلا الوجــود نـوره
دعـــانـي لبيتـه,,,,,لحـد بـاب بــيـتـه
ولــمـا تـجـلالــي ,,,,,بالــدمـع نـاجـيـتـه
*************** *****

كـنـت أبـتـعد عـنـه,,,,,وكــا ن يـنـادينـــي
ويـقـول مـصـيرك يـوم,,,,,تخـضـع لـي وتـجـينـي
طاوعــني….. ياعـبـدي ,,,,,طـاوعـنـي أنا وحــدي
أنـا الـلـي أعـطـيـتك,,,,,م ـن غـير مـا تـتـكـلـم
وأنـا الـلـي عـلـمـتك,,,,,مـ ن غـير مـا تـتـعـلـم
والـي هـديـتـه إلـيـك,,,,,لـو تـحـبـه بـاديــك
تـشـوف جـمـأيـلـي عـلـيـك

من كـل شـئ …أعـظـم ,,,,,ســلـم لـنـا تـسـلـم
دعــانـي لــبـيـتـه,,,,, لـحـد بــاب بـيـتـــه
ولـمـا …. تـجـلالـي,,,,,ب ـالـدمـع نـاجــيــتـه
*************** **
مـكـه وفيها جبال النـور,,,,,طـال ـه علي البـيـت الـمعمور
دخـلـنا بـاب الـسـلام,,,,,غـ مـر قـلـبـنـا الـسـلام
بـعـفـو رب غـفـور
فـوقـنا حـمـام الحـمي,,,,,عــد د نــجـوم الـسـمـا
طـأيـر علينـا يـطـوف,,,,,ألـو ف تـابـع الـــوف
طايريهني الـضـيـوف,,,,,ب الـعـفـو والـمرحـمـة
والـلـي نـظـم سـيـره,,,,,واحـ ـد مـفـيـش غـيره
دعــانـى لـبــيـتـه,,,,, لـحـد باب بـيـتـه
ولــمـا تـجـلالــى,,,,, بالــدمـع نـاجـيـته
*************** *

جـيـنـا عـلـى روضـه,,,,,هــال ـه من الـجـنـه
فـيهـا الأحـبـة تـنـول,,,,,كـل الـلـى تـتـمـنى
فـيـهـا نـور عـلـى نور,,,,, وكـاس مـحـبـة يدور
والـلـى شـرب …. غـنـى

ومـلايـكـة الـرحـمـن,,,,,ك ـانـت لـنـا … نـدمـان
بالـصـفـح والـغـفـران,,,, ,يـنـولـو مــــا نـلـنا
يـاريـت حــبـايـنـا,,,, ,يـنـولـوا مــــا نـلـنا
يــارب تــوعــدهـم,,,, ,يــارب واقــبــلـنـا
دعـــانـى لـبـيـتـه,,,,,ل ـحـد بــاب بـيـتــه
ولــمــا تـجـلالـى,,,,,ب الــدمـع نــاجــتــه

من طرف hoss65 السبت مارس 08, 2008 12:39 pm

باريس تقول قصّروا الفساتين

*************** *****

باريس تقول قصّروا الفساتين00نقصره ا
ترجع تقول طّولوا 00 حالاً نجرجرها
و في الشتا - قوّروا القمصان00نقورها
و في الصيف زرّروا الأرّواب000نزرر ها

و تقول باريس أحلقوا الشنبات ، نحلقها
و تقول لنا الدقن مودة اليوم ، نلزقها
و تقول لنا استعملوا الشورتات ، نسبقها
و تقول كمان اقلعوا الطرابيش ، نكعورها

و تقول ((فيينا)) ارقصوا00نحيّ ليالينا
و تقول ((موناكو)) العبوا00نفتح نوادينا
و تقول ((جلاسجو)) اشربوا،نسكرلهاط ينة
و الخمرة قال مش حرام و الجوزة نكسرها

عميان و عايزين لنا مجانين تسحبنا
و لو يخوضوا بنا الأوحال يعجبنا
مين شاف خلافنا أمم بتحب جزارها

يارب تسلم باريس و تصوم وتصلي
و تكون موضتها سبح ولاّ طرح تلي
عشان ما تصبح سعاد وأم الهنا و نيللي
غير ربنا ذو الجلال ما يشوفش ضوفرها

<BLOCKQUOTE>باريس
يامدمزيل ياللي ف قصرك يازينه عصرك
المبسط يحبك على خصرك يتهز قوام
في الحرب بتواسي المجاريح فوق الطراريح
وتـقـلبي الغـم بـتـفـريح والنار بغرام
ومشيتـك في السكه غزال وقيافتـك عال
كدا سلت ملت مفيش خلخال وسخام لطام
ولا الايدين فيها غوايش ولا شيء حايش
كدا لهط مهط فطير بايش اشمط وانام
اللحم ابيض ومزقـلط وبيـتـزفلط
والوش ده مش متخطط زي ام لتام
دول في المدارس ودوكي بيربوكي
الله يخليكي لابوكي وامك ياتـمام
طلعتي حافضه جغرافيا وصحه وعافيه
حتى اللي هوه بلا قافيه حافضاه ياسلام
البنت عضو في اكاديميا وتعرف كيميا
خلينا احنا في الباميا والفقر التام
تمسك ياعم ايد التلفون مش ايد الهون
اللي تسمّع في الكركون والناس ح تـنام
فين اللي تعـتر في الحلّه وتكسر قـلّه
من اللي تـنقـش دانتيلّه من البفته الخام
مفروده دايما لاتبوز ولا تـتأوز
عازبه ولما بتجّوز تعمل له مقام
يبوسها قدام جمعيه وتبوس هيه
لا كسكسه في الحريه مسيو ومدام
مادام يحبها وتحبه وداخله ف عبه
مايسبهاشي ولا بتسبه من عنده كلام
اما الا نيته ام جلاجل تاخد الراجل
تركبه الفقر العاجل وتجيب له لجام
متجوزاه وعاملاه سلم لويتـكلم
الضرب على صدغه يعلم اكفف واقلام
تدخل وتخرج ماتشاور عايزه اساور
ماتخلي شرطي ولامجاور ولا واد خدام
عليها حته دين عرقوب ولسان مسحوب
وصدغ اطول م المركوب وتياب قُدام
وجوزها يشرب بنوره وهيه طاطوره
تحبل وتولد بالطوره زي الأغنام
يـيجوا العيال اللي يهرهر واللي يـبربر
ودا اللي اقرع واللي اعور واللي له خزام
اطفال اوربا ف عربيات ومربيات
وبزازات وتبات ونبات ولهم حمام
لا ده ابوه مليارد كبير ولا دا ابن فقير
مادام دا يبقى طفل صغير تعذيبه حرام
قال الكرم خد اموالنا امال مالنا
يارب سايـبيـن اطفالنا زي الايتام
مكومين كدا في الشارع روس وكوارع
والسلسله وعضم الذارع والباقي عضام
تدوسهم الساده الشماليل يعني المساطيل
المجعوصين جوا الطومبيل زي الاصنام
آه لما اشوف رزق الجاهل كدا بالساهل
صاحب وجاهه دا بيستاهل حكم الاعدام

</BLOCKQUOTE>

من طرف hoss65 السبت مارس 08, 2008 12:39 pm

سيداتى
*******

ميت ألف راجل بما فيهم من الشنبات
ما يجوش في ضافر صباع واحده من الستات
مهوش عجب - كل يوم تتقلب البورصات
سعر النهارده الأراضي تنقلب سماوات

******

دخلو على البرلمان في خفة العصافير
بدون ليحيا و ليسقط و لا تجعير
و بدون فضايح و لا فوضى و لا تكسير
باتت لكل اللغات تتجاوب الاذاعات

******

( الناخبون ) شفتهم بالعُصي والنبابيت
ساحبهم (المحترم) عالقسم تصويت
و لجل يثبت وجودهم كسروا الحوانيت
ما خلوا دكان يبيع كشري و لا شربات

********

يا سيداتي اهجموا و اتقدموا على طول
خطوا كمان خطوه واحده تبلغوا المأمول
إيد المره في الزمان ده كل حاجه تطول
والخيبة راكبة الرجال،اللي اسمهم بهوات

********

يا ريت وزارات زمان كلها فساتين
و برلمانات زمننا تمتلي حلوين
لكان بدال البارود الورد و الياسمين
و لا كانش نص الخلايق يندفن في الصين
و نصهم ينجزر في معركة برلين
ايه اللي نابنا من الأقطاب والأساطين
غير الهموم و النكد و الحرب و الأزمات

من طرف hoss65 السبت مارس 08, 2008 12:42 pm

المنجم

ما عمري يوم للمنجم رحت اســــــــتفتيه

اللي مضى اعرفه ، و اللي حضر ، انا فيه

و من كرم ربنا ، مستقبلي خافيـــــــــــ ـــه

***

لو كنا نعرف نهاية امرنـا يا قــــــــــــــ وم

كـام يوم نشوف السعاده والشقا كام يــوم

لا يطيب لنا عيش ولا تهنا العيون بالنـوم

الشر و الخير ، بلا منجم ، حا نستوفيــه

***

ومين يا عم المنجم ؟ مفتري نصـــــــاب

الناس رآهم حيارى فاشتغل كـــــــــــذاب

و الكذب ابواب و نعرف كلنا الابــــواب ..

***

ان قال لي عندك قضيه ، كلنا مشاكلين

وان قال لي تسافر قريبا ، كلنا مسافرين

من دنيا رايحين لآخره ، و المخلد مين

لعن المنجم � ولو يصدق � كل كتاب

***

ومين يروح للمنجم ؟ الهمج لا غير

الست دولت ، و غانم والدسوقي بدير

و عبده افندي و زينهم ، و اسماعين و خضير

***

لا عقل فيهم و لا مله ، و لا ايمان

و لا حفظ بعضهم آيه من القرآن

جعلوا المنجم اله ، لك حكمه يا رحمن

***

جعلت قرش المنجم قرش كل سفيه

ما عمري يوم للمنجم رحت استفتيه

قصة المأذون

ايام ما كان الحريم خلف الستاره مصون

كان اي واحد جهول يفتح خطيب مأذون

يجوزك بالمقاوله .. ولا بالعربون

و انت بختك يا تسعد تلاقيها دون

***

استفتح الشيخ في اول ما اشتغل بطلاق

حرمه اميره .. وجوزها سئ الاخلاق

والقاضي يحكم في شرع المسلمين بفراق

على المره المجرمه ، و الراجل المجنون

***

الست من ناس زمان ، صاحبة ادب و كمال

م الحشمه دل الي لا خاتم ولا خلخال

والليما عطاها صيغه ، ما عطاها جمال

يكفي التقى و الصلاح و الملح و الكمون

***

مأذوننا كان واد عبيط عمره ما شافش حريم

من يوم ما أزهر � لغاية ما انتهى التعليم

شاف وحده ساده .. بلا لبه و بلا مباريم

قال ما شاء الله .... و اللي كان ما شاء يكون

***

يا ست كان حق جوزك دا يبوس رجلك

لكنه فاسق لا يصلح لك � ولا يليق بك

لازم اوف لك انا راجل امير مثلك

م اللي يحافظ على عرض النساء و يصون

***

قالت انا واحده ، لا بودره ، و لا احمر

عايزا لي راجل لا يتمرقع و لا يسكر

يعرف مقامي ولا يخبص ولا يسهر

وانشا الله آكل معاه ملح وبصل و زتون

***

بقت تروح للخطيب ، في كل يوم نوبتين

لحد ما شاف لها راجل قعد لها شهرين

مراته ماتت و فايته م العيال اتنين

عايز لهم واحده لو خان الزمان ما تخون

***

مأذوننا قال له .. انا عارف مره حره

عيني ما شافت اميره ملها مره

وبيتها مليان موبيليا من بلاد بره

رأيتها لما انتهت م الراجل المجنون

***

فيها البساط وحده يفرش الجامع

ودولاب عجيب لو تشوفه تلتقيه لامع

ولما كان بعلها في غشها طامع

رهن كراسيها عند القهوجي انطون

***

ابو العيال بات ليلتها عالمدام قاعد

والمهر خمسين جنيه فوري راح ناقد

وبعدها بجمعه كان فراشها راقد

شاف لك دي حته مره انشف من العرجون

***

البين نحل جسمها و الهم كاويها

والفقر راخر متمم شغلته فيها

و الموت هجم ع الحبايب من حواليها

خلا القرايب و الحبيب تحت التراب مدفون

***

في ليلة الدخله لابسه القميص ساتانيه

وتب طويل فوقه و البالطو القطيفه عليه

اسود طويل للقدم .. تفصيل كمال واديه

بكرك ابيض عريض و الصدر بالكبون

***

اما الموبيليا اللي كان طاير بيها الاستاذ

صندوق بسبعين و ستاشر صفيحه جاز

فارغين و فوقهم قبايبها تلات اجواز

و اربع مغارف خشب ابيض و ست صحون

***

صبح يشوف الخطيب واقف بيستنظر

طالب حلاوته خروف يتحط في انجر

ضحك و قال له نهارك يا عريس ازهر

قال له نهارك زفت متقطرن يا شيخ ينسون

***

قال اما انك صحيح .. مسروع و غاتوتي

مالكش صنعه الا يا مأذون يا حانوتي

سعيت لي في الخطبه وبتسعى على موتي

والاجر في الشغلتين يا شيخ على مضمون

من طرف hoss65 السبت مارس 08, 2008 12:43 pm

( لا تجاب كل الطلبات )

ان عيط الواد وقال لك اشتري نعناع
وحمصية ونبوت الغفير وبتاع
أوعك تطاوعي كلامه واعملي طرشة
والسقم والسم أصله من أيد البياع

( الملابس النظيفة )

بيعي الغوايش وهاتي للولد بدلة
وطلعي من جيوبه الكعب والنحله
وعلمية عالنظافة والأدب والذوق
أحسن يدور في الحواري يعجن الوحلة

( الخرافات )

وشيطلي قولة العفريت والغولة
ليطلع الواد عبيط والبنت مخبولة
متعرفيش الكلام ده يتلف الأولاد
ويفرجوكي المرار وتعيشي مخبولة

( آمين )

قريضة تأخد اللي زيك من دمن النسوان
وتموتي أحسن ولايكونشي الولد تلفان
خايبة .. ومايلة .. تدوسك كهربا قادر
ويستريح من فعايلك جوزك الغلبان

***

دبقتي جوز الأساور من قفا المسكين
الوزن 100 عيارة أربعه وعشرين
ولما يسأل تفولي دول بتوع أختي
لهو أنت بتجيب أساور ؟ دانت عيشتك طين
تخدي الفلوس بالربا وتفصلي حبره
وتجرجري الديل وقال إيه واحدة معتبرة
إنشا الله عمرك ما توعي تفرحي بيها
ويحطوها لك نهار الغسل بالوبرة
حطي يا بنت الحلال قلبك علي قلبه
ودبري البيت وهو يعيش علي غلبه
دي كل واحدة فطينة يحبها جوزها
والناس يقولم يحب مراتة وتحبه

من طرف hoss65 السبت مارس 08, 2008 12:45 pm

الورد

في كل عام للورد اوان الا النسوان
بقدرتك نابتين الوان ابيض و احمر
وانت اللي تعلم وان اجهل فيه ايه اجمل
من دي الخدود اللي لا تدبل ولا تتغير
ودي العيون اللي اشهد لك بها و اسجد لك
دي خلت الطاغي انقاد لك والمتكبر
والشفتين اللي فالقهم كنت خالقهم
للابتسام و لا لازقهم دانت تحير
بذمتي انت اللي جاذبني يا معذبني
و ياللي ذوقك يعجبني لما تصور
لك صنعه في العين و الحاجب بيها تتعاجب
وتقول وجود الله واجب مين بيه يكفر
ولك قوالب للاجسام غلب الرسام
يقلدك بحجر و رخام يلقاك اشطر
يا ست يام زناق محبوك وقميص مفكوك
حطي على القلب المشبوك ايدك يعمر
ويام نص ملايه حرير و النص يطير
على الكتاف انا عقلي صغير غطى المرمر .....
وياللي ساقـك يسوى رقاب حارت الباب
في لون حقيقته ان كان بشراب و لا مقـشر
و ياللي خصرك له حركات تقفل شركات
ويضج منها داوود بركات لما يحرر
وياللي لابسه لي جوانتي اربعه سنتى
على ايه خفيتي و بينتي في اللي ما يظهر
و ياللي بالدراعات تمشي و لا تحتشمي
متشمره لي وما اقدرشي عالمتشمر
و يام شمسيه عايقه على فين سايقه
يا مركبه الورده اللايقه ع المتشــــــجر
هواكي الياسمين هافف و حلق رافف
يصافح العقد اللافف على دى المنحر
يا مسلمين الله يا حريم انا مالي غريم
غيركم اروح وياه في جحيم يوم المحشر
الدنيا و النسوان خلاص و الراجل لاص
لا طبله تـنفع و لا بلاص لو يتكسر

يا شرق فيك جو منور

والفكر ضلام

وفيك حراره يا خساره

وبرود اجسام

فيك تسعميت مليون زلمه

لكن اغنام

لا بالمسيح عرفوا مقامهم

ولا بالاسلام

هي الشموس بتخلي الروس

كدا هو بدنجان

******

يا بــنت باني الهرم لمي هلاليلك
و البرقع اللي انخرم ويا مناديلك
يكفي لومان في الحرم
في قيد خلاخيلك
ما شفت زيك سجين ساكت و متاوي
غلبت اقول للرجال خلوا المره حره
تخش رخره المجال تفهم و تـتـدرى
العاقله بنت الحلال ما يضرهاش بره
لكن بتنصح ف مين روس جامده صنطاوي
جهل النسا بالعلوم خلانا انتيكه
نفهم في فن الهدوم رقعه و تشتيكه
وفي البلد عالعموم
ما تلقى فابريكه
غير فابريكات الطحين
فليحيا بدراوي
راية ولاد العرب في الارض منكوسه
طول عمرها و السبب احسان و نفوسه
والله اللي قال ما كدب نسوانا موكوسه
حتى اللي متعلمين بردون يا شعراوي

*************** *************

عجلي ملخبط يا خلايج و عنيه مزغللين
من نسوانك يا فرنسا البيض العريانين
يا صلاة الزين يا ما شا الله يا ولاد عالنساوين
على شط السين يا محمد نايمين و ممدين
واحده عاتعوم في الميه و التانيه في الكابين
لابسين خلجات للركبه دايبين و مجطعين
و اللحم زبده طريه كاسياه الفساتين
مطرح ما دوس و اطبش ملجاشي الا عجين
ونا هاتعجب يا خوانا يخرب عجلي التخين
اشمعني جفاهم ابيض و جفايا زي الطين
ونا ناشف ليه و معضم ودولاته متختخين
*****
والله صغير يا محمد حبسوك سبع سنين
و امك عاتجول يا محمد واختك يا محمدين
وجرايب جرعت باشا لابسين النياشين
تلقاهم في الجزيره قاعدين و مفرشين
للبيه منهم تكريعه يسمعها اللي ف شبين
صدج من قال بلادنا دي بلاد المنفوخين
بالبنطلون و الستره عاملين متمدنين
ليل ونهار يا حبايب مساطيل و منزلين
ما يشوفوا الطور من النعجه و الفرخه م الهاجين
ابكي عليك يا معوض مسكين والله مسكين
وحديك قاعد و حبايبك في البلدان مزعوطين
زغلول باشا المجاهد في بلاد العيانين
والسلطه العسكريه قطعت ايدي اليمين
و اللورد له اوامر مكتوبه عالجبين
لا البرلمان يمسحها و لا حتى الشياطين
*****
شوف الخفه .. ام الشعور اللفه فوق اللفه غير ام الشعر طويل
و المقصوعه و رجلها فوق اختها مرفوعه تستنظر الطوموبيل
و الحرانه من المعاصم للكتاف عريانه زي اللي غاسله غسيل
و الملفوفه باين عصبها و النهود مكشوفه ما خلت الا قليل
و المحتاره بالشنطه و الشمسيه و النضاره رايحه على التمثيل
و الغندوره تحسبها لولا مشيتها صنيوره والا ام خصر نحيل
طالع نازل لولا ما هي ماسكه دراع الراجل من لمسه وحده تميل

من طرف **نور الاسلام** السبت مارس 08, 2008 3:22 pm

الله بجد اشعار روعه

شكرا جدا يا استاذ حسام

من طرف KHALOUDA الأحد مارس 09, 2008 9:03 am

جميل حسام

من طرف hoss65 الإثنين مارس 31, 2008 4:22 pm

نور الاسلام كتب:
الله بجد اشعار روعه

شكرا جدا يا استاذ حسام

شكرا نور على المرور

من طرف امير الاتحاد الخميس أبريل 10, 2008 9:27 pm

شكرا على الموضوع الهايل ونا سعيد جدا جدا بالموضوع ده لانى من عشاق بيرم التونسى

من طرف hoss65 الأربعاء مايو 28, 2008 6:43 am

KHALOUDA كتب:جميل حسام

سعيد بمرورك ياخلودا نورت الموضوع

من طرف hoss65 الأربعاء مايو 28, 2008 6:43 am

امير الاتحاد كتب:شكرا على الموضوع الهايل ونا سعيد جدا جدا بالموضوع ده لانى من عشاق بيرم التونسى

انا الى سعيد بمرورك
نورت يا امير

الشاعر ...بيرم التونسى

الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى

رد: الشاعر ...بيرم التونسى